♪ ♪ Um Mig ♪ ♪ Gestabók ♪ ♪ Félagar ♪ ♪ Linkar ♪ ♪ E-mail ♪ ♪ Gamalt ♪ ♪



fimmtudagur, september 14, 2006

Nei vá... ég er með bloggsíðu!




þriðjudagur, mars 28, 2006

Það hefur þá loksins gerst að einhver af stærstu fréttamiðlum heims veki máls á grunsemdum fólks varðandi atburðina 11.september. Það var þá eftir að Charlie Sheen lýsti því yfir í útvarpsþætti að hann væri á því að 11.september væri samsæri. Sjáið fréttina hér, því vonandi verður þetta til þess að þessar grunsemdir verði viðraðar fyrir augum almennings í meira mæli. Athygli vekur könnunin sem gerð er í þættinum: "Do you agree with Charlie Sheen that there is a government cover up regarding the 9/11 attacks?" Þegar þarna var komið við sögu sögðust 65% aðspurðra trúa því. Á endanum höfðu rúmlega 46.000 manns kosið og svöruðu 84% þeirra játandi.

http://infowars.com/articles/sept11/sheen_alex_jones_showbiz_tonight_video.htm




sunnudagur, febrúar 19, 2006

Eftir nokkurra umhugsun hef ég ákveðið að blogga. Þessi færsla er þó hugsuð ekki sem endir á þessari síðu, heldur sem útskýring á því að þar sem ég hef flust búferlum niður á Grettisgötu 83 þar sem ég hef ekki greiðan aðgang að netsambandi hef ég ekki getað sinnt þessu mikið. Það er margt sem hefur gerst síðan ég skrifaði eitthvað hingað síðast, of margt til þess að það taki því að telja það upp, en þó of lítið til að það taki því að telja það niður.

Passið síðan að láta ekki ljúga að ykkur.




mánudagur, desember 19, 2005

Fékk bréf sent sem innihélt setningu sem orðar vel áhyggjur mínar og er óþægilega sönn.

"Corporations are killing humanity for profit. And most of the people in the world agree to be in on the gig."

Því svo bókstaflegt er það.




miðvikudagur, desember 14, 2005

Í kvöld verða tónleikar til styrktar 11.september hreyfingunni á Íslandi. Fram munu koma ýmis bönd málefninu til stuðnings. Húsið opnar klukkan 8 í kvöld og kostar 500 kr. inn.

Eftirfarandi hljómsveitir koma fram:

Bob
Brylli
Noise
Palindrome
Touch
We Painted the walls
Mammút
Lokbrá
Bent & 7Berg
Megasukk (Megas + Súkkat)




þriðjudagur, nóvember 29, 2005

"Helsta skylda mannsins er leitin að sannleikanum"

Þetta sagði rómverski rithöfundurinn Cicero sem ræðukeppni Háskóla Íslands dregur nafn sitt af. Hversu mikill sannleikur er í þeim verður hver að meta fyrir sig en það er þó víst að við erum ekki hrifin af því að láta ljúga að okkur. Mannskepnan hefur þó lengi notast við lyga til að koma sér áfram í lífinu og til að koma sér úr óþægilegum aðstæðum. Þær lygar sem einstaklingar nota eru þó oftast lítilvægar "Afsakið hvað ég kom seint í vinnuna, ég varð bensínlaus á leiðinni" og því um líkt. Þegar um ráðandi öfl er að ræða eru þó til ótal dæmi þess að staðreyndum sé hagrætt á svo stórfenglegan hátt að flestum þætti ósvífni að efast um sannleika þess. Þetta er fyrirbærið um "stóru lygina" sem Adolf Hitler talaði um í Mein Kampf og hafa stjórnvöld notað þessa vitneskju allar götur síðan. Því stærri sem lygin er, því ólíklegra er að fólk efist um hana.

Það er nú orðið ljóst að okkur var ekki sagður sannleikurinn um atburðina 11.september 2001. Nógu mikið hefur komið í ljós til að allir sem hafa kynnt sér þetta mál af einhverri alvöru, sjái, að opinber skýring stjórnvalda stenst ekki grandskoðun.

Ég er að mörgu leyti sammála Cicero, þegar ég kemst að því að það sem ég hélt, og almenningur heldur um þessar árásir, þann stærsta sögulega atburð í mínu lífi, sé ekki sannleikurinn, þá kvikna spurningar.

Nú er svo komið að amk 49% af íbúum New York borgar trúa því að Bandaríkjamenn hafi haft vitneskju af yfirvofandi árásum og tekið meðvitaða ákvörðun um að verjast þeim ekki. 66% þeirra vilja að rannsókn málsins verði opnuð á nýjan leik.

Nú þegar meira en 4 ár eru liðin frá árásunum, þykir mér ljóst að Bandaríkjastjórn deilir ekki viðhorfi Cicero. Þrátt fyrir ótal spurningar sem brunnið hafa á vörum almennings í Bandaríkjunum hefur Bandaríkjastjórn ekki gefið þeim nein svör. Enn þann dag í dag hefur engin óháð rannsókn á atburðum þessa dags verið leyfð og hefur aðeins 600.000$ dollurum verið varið í rannsókn "the 9/11 commission" sem var alvarlega gölluð rannsóknarnefnd. Það í samanburði við 40.000.000$ sem var "varið" í að rannsaka mál Monicu lewinsky og Bill Clinton ætti að sýna hversu sama bandaríkjastjórn virðist vera í að komast til botns í þessu máli og sanna hver stóð fyrir stærstu árás á bandarískri grundu fyrr og síðar.

Enn í dag hefur ekki einn maður verið kærður fyrir að taka þátt í að skipuleggja árásirnar og ekki eitt sönnunargagn verið gert opinbert til að tengja Al Queda og Osama Bin Laden við undirbúning þeirra. Þetta þrátt fyrir ítrekaðar yfirlýsingar Bandaríkjastjórnar og heimsbyggðarinnar um að ná "heiglunum" sem stóðu á bak við þær.

Hér eru nokkrar spurningar, sem ég hefði gaman af að fá að heyra svar við. Ég bið einnig þig, kæri lesandi, að velta því vandlega fyrir þér hvernig stendur á því að þú veist ekki svarið við þeim.

A.m.k. 6 af flugræningjunum sem FBI birti hafa birst í viðtölum víðs vegar um heim (m.a. í The Telegraph) á lífi, eftir 11.september 2001, mjög ósáttir við að vera grunaðir að ósekju um aðild í sjálfsmorðsárásum. Margir þeirra kvörtuðu yfir því að hafa týnt vegabréfum sínum, en einhver þeirra fundust síðan á dularfullan hátt í rústum WTC. Þ.e.a.s. Eldurinn sem á að hafa verið nógu heitur til að bræða járnið í turnunum með þeim afleiðingum að þeir féllu hafði samt ekki roð við harðgerðum vegabréfum flugræningjana sem klesstu á turnana... Fjölskyldumeðlimir annarra af listanum hafa síðan lýst yfir sakleysi þeirra. Þetta eru staðreyndir sem alltof fáir eru meðvitaðir um.

Þá spyr ég, fyrst að þessir 6 menn höfðu augljóslega ekkert með flugránin að gera, hverjir þá? Hvers vegna er það ekki rannsakað?

Veltum svo öðru fyrir okkur. Við vitum að það er fólk í vinnu við að fylgjast með öllum áætlunarflugum innan Bandaríkjanna. Þetta fólk er þjálfað til að bregðast rétt við ef eitthvað fer úrskeiðis. Samkvæmt opinberum reglugerðum sem voru til staðar fyrir 11.september ber öllum flugumferðarstarfsmönnum að kalla út herþotu þegar flugvél fer út fyrir áætlunarleið eða ef hún missir fjarskiptasamband. Herþotan kannar ástandið og ef ekkert samband næst reynir hún að þvinga vélina til lendingar. Af því sem hafði liðið af árinu 2001 þann 11.september hafði 129 sinnum þurft að senda herflugvél til að kanna stöðu áætlunarflugvéla.

11.september fara fjórar stórar áætlaðar flugvélar alvarlega út af leið. Klukkan 8.13 missir Pete Zalewski frá flugumferðarstjórninni í Boston samband við flug 11. 5 mínútum síðar er vélin farin alvarlega út af áætlunarleið. Klukkan 8.46 flýgur vélin inn í Norður Turn WTC án þess að ein herþota hafi verið send á loft. Á þessum tíma er vitað að flugi 175 hafi verið rænt en engu að síður kemst vélin óáreitt beint á suðurturninn klukkan 9.03

Þegar þarna er komið við sögu er orðið ljóst að það er verið að ráðast á Bandaríkin og fréttir komnar út um allan heim af atburðunum. Bush er látinn vita af árásinni en sér ekki ástæðu til að forvitnast frekar um það, né er honum komið í öruggt skjól eins og eðlilegt væri ef hryðjuverkaárás á bandaríkin ætti sér stað. Eins og mörgum er nú kunnugt sat hann í 5-7 mínútur og hlustaði á skólabörn lesa fyrir hann "My Pet Goat"

Þótt þessir viðburðir séu nóg til að vekja upp ótal spurningar um viðbrögð flugyfirvalda og hersins er ekki með nokkru móti hægt að útskýra, hvernig þegar að þarna er komið við sögu, sé þriðju vélinni leyft að fljúga í rólegheitum inn í höfuðborg Bandaríkjanna, yfir hvíta húsið og síðan inn í best vörðu byggingu í heimi, Pentagon. Þetta gerist kl. 9.37, rúmum hálftíma eftir árásirnar á WTC og um þremur korterum eftir að flugumferðarstjórn missti samband við vélina.

Hvernig getur mannshugurinn samþykkt þá fullkomnlega órökréttu niðurstöðu að allan þennan tími lyfti enginn litla fingri til að koma í veg fyrir frekari árásir?? Þegar þúsundir hafa dáið og ein stolin flugvél í viðbót er á leið inn í höfuðborg Bandaríkjanna beint fyrir framan nefið á radar bandaríkjahers, pentagon og flugumferðarstjórnar?

Það eru herstöðvar út um öll Bandaríkin sem hefðu getað brugðist við í tæka tíð. Andrew´s Air Force Base er staðsett 12 mílur frá Hvíta Húsinu, en þar er forsetaflugvélin geymd. Þar er líka hópur háþróaðra F-16 herþota sem eiga að tryggja öryggi höfðuborgarinnar. Þær eru ekki sendar á loft fyrr en síðar um daginn, nokkru eftir að flugvélin á að hafa skollið á Pentagon. Sem allt bendir reyndar til að sé ekki rétt.

Pentagon er með eldflaugavarnarkerfi sem við þessar aðstæður hefðu skotið allar Boeing 757 þotur sem stefndu að því, sérstaklega þegar vitað var af árásunum á turnana. Það hefur síðan komið í ljós að það er engin leið að Boeing 757 hafi ollið skemmdunum sem sáust á Pentagon byggingunni. Gatið sem myndaðist var of lítið fyrir þotu af þeirri stærð og skemmdirnar of litlar. Slík þota hefði skilið eftir sig mikið brak, flugsæti, stél, hreyfla o.s.frv. Ekkert slíkt er að finna á neinum þeim myndum sem hafa birst af Pentagon eftir árásirnar.

Þá spyr ég, ef það var ekki Boeing 757 sem flaug inn í Pentagon, hvað var það þá? hvað varð af flugvélinni sem var rænt og hvers vegna er þetta ekki rannsakað?

Og síðan spyr ég einnig, ef eina ástæðan fyrir því að ekkert var gert til að verjast neinum þessara flugvéla voru mannleg mistök, hver ber þá ábyrgð á svo glæpsamlegum afglöpum sem kosta þúsundir manna lífið og af hverju er það ekki rannsakað?

Við hrun turnanna vakna síðan ótal spurningar. Fjölmargir rannsóknarmenn hafa véfengt þá opinberu útskýringu að burðarbitar hafi bráðnað, bognað og gefið sig með þeim afleiðingum að turnarnir féllu. Suðurturninn féll á u.þ.b 10 sekúndum. Það þýðir að hefði maður hent steini af þaki turnsins á sama tíma og hann byrjaði að hrynja hefði lent á jörðinni á sama tíma og turnarnir. Þ.e.a.s, á hraða frjáls falls. Til að það gangi upp þarf hver hæðin að detta ofan á hver aðra án þess að nokkur þeirri veiti hið minnsta viðnám.

Séu myndir af hruninu skoðaðar sést glögglega að það eru öflugar sprengingar sem eiga sér stað þegar turninn hrynur. Stál bráðnar ekki nema það nái 1500 gráðu hita. Þegar turnarnir hrundu voru eldarnir í þeim að hjaðna og reykurinn orðinn svartur sem bendir til þess að hann hafi verið orðinn súrefnislítill og eldurinn verið að kólna. Hæsta hitastig sem brennandi flugvélaeldsneyti getur framkallað er 1200 gráður. Hundruðir vitna töldu sig heyra fjölmargar sprengingar í og við turnana þennan morgun.

Eitt af dularfyllstu atburðunum 11.september var svo hrun WTC byggingu 7. Engin flugvél né turn skall á henni og byggingin var nánast ósködduð. Klukkan tíu mínútur yfir fjögur sáust aðeins nokkrir litlir eldar brenna á einöngruðum stöðum í byggingunni. Klukkan 17.20 hrynur hún skyndilega frá grunni. Þetta hrun á sér stað á sama hátt og þegar byggingar eru sprengdar skipulega af byggingaverktökum.

Larry Silverstein, eigandi WTC bygginganna sagði í viðtali við PBS sjónvarpsstöðina að þeir hefðu ákveðið að "pull it" sem er verkfræðihugtak yfir sprengingar af þessu tagi. Þar sem slíkar sprengingar taka 2-3 vikur í undirbúningi er ljóst að sprengjum hafði verið komið fyrir í byggingunni fyrir 11.september. Eldur hefur aldrei, fyrr né síðar náð að knésetja byggingu á þennan hátt. Er slíkt náttúruundur ekki þess virði að rannsaka?

Er ekkert af þessu þess virði að rannsaka? Bush og Cheney hafa margsinnis lýst yfir andstöðu við rannsóknir og yfirheyrslum á þessu máli. FBI hefur margsinnis orðið fyrir ásökunum um að eyða sönnunargögnum og hindra framgang réttvísinnar. Brotajárnið úr rústum WTC var brætt og selt til Kína aðeins örfáum dögum eftir 11.september en það hefði mátt nota til að sýna fram á notkun sprengiefna.

Hvar eru svörtu kassarnir á flugvélum? Hvað hafa flugumferðarstjórarnir og talsmenn hersins að segja um þessi ólýsanlegu seinu viðbrögð 11.september? Hvar eru öryggismyndavélarnar frá Pentagon? Hvar eru sönnunargögnin sem eiga að tengja Al Qaeda við árásirnar? Af hverju er Osama Bin Laden frá myndbandinu alræmda (einu "sönnununum" sem hafa verið settar fram) augljóslega ekki Osama Bin Laden? Ég hvet ykkur til að skoða myndir af Osama Bin Laden og skoða svo myndbandið sem Bandaríkjastjórn gaf út, það er fáránlegt og ætti að vera öllum vitsmunaverum ljóst að þetta er ekki sami maðurinn, þó þeir eigi það sameiginlegt að vera með skegg.

Hver bar ábyrgð á ólöglegri 100$ dollara sendingu úr tölvukerfi WTC að morgni 11.september fyrir árásirnar? Af hverju stöðvaði FBI ekki sprengjuárásirnar á WTC 1993 þrátt fyrir að þeir hafi vitað fyrirfram að árásunum og vísvitandi ekki komið í veg fyrir þær. Það var sannað í réttarhöldum með hundruðum klukkustundum af kassettum sem innihéldum samtöl Emad Salem við yfirmann FBI, en Emad hafði unnið fyrir FBI sem uppljóstrari.

Af hverju halda margir enn í dag að Al Qaeda hafi staðið á bak við þær árásir þrátt fyrir að nafnið Al Qaeda hafi fyrst komið fram í tengslum við árásir á sendiráð BNA í Nairóbí 1998?

Af hverju voru árásirnar 11.september svona grunsamlega hentugar við að hrinda í framkvæmd áætlunum nýíhaldsmanna innan Bandaríkjastjórnar (Cheney, Rumsfeld, Wolfowitz o.fl) sem sett var fram í september 2000? "The Project for the New American Century" Þar var talað um að þeir þyrftu að auka útgjöld til "varnar"mála um 100 billjónir og taka upp harðari utanríkisstefnu. Þá ættu þeir ekki að hika við að ráðast inn í lönd að fyrra bragði ef þeir teldu þörf á því. Þar stendur líka að til þess að þetta geti tekist þurfi þeir: "new catalyzing event, like a new Pearl Harbour" Síðast en ekki síst stendur þar skýrum stöfum að Bandaríkjamenn þurfi að leggja sig fram við að komast yfir náttúruauðlindir jarðarinnar, með sérstakri áherslu á olíu á persaflóasvæðinu.

Ári síðar kemur þessi heppilegi atburður og stríðið gegn hryðjuverkum hefst. Engin spyr spurninga þegar ráðist er inn í Afganistan, því þar voru jú Al Qaeda og Osama bin Laden og eins og bna stjórn hafði haldið fram risa bækistöðvar frá Al Qaeda í fjallagörðunum í Tora Bora... Ekkert af þessu fannst síðan í Afganistan en það er víst aukaatriði ekki satt? Það var það allavega fyrir þá þúsundi múslima sem staflað var af handahófi í gáma og sendir til pyntinga til Guantanamo eða hinna ýmsu leynifangelsa CIA víða um Evrópu.

Síðan er nauðsynlegt að velta fyrir sér nokkrum spurningum sem við mundum spyrja við öll önnur sakamál. Eins og t.d. Hverjir græddi á árásunum? Múslimar? Hryðjuverkamenn? Allah??

Hverjir höfðu tök á að framkvæma árásirnar? 5 arabar með dúkahnífa? Búsettir í Bandaríkjunum að skipuleggja fjöldamorð í 4 ár án þess að CIA sem hefur eyru og augu um öll Bandaríkin átti sig á því?

Af hverju eru flestir ómeðvitaðar um þessar staðreyndir sem ég hef tekið til hér að ofan, þrátt fyrir að upplýsingar um þetta sé hægt að nálgast á ótal stöðum? Af hverju hef ég svona mikið af spurningum sem mig vantar svör við? Af hverju hafa New York búar svona mikið af spurningum sem þeir hafa ekki fengið svör við? Hvað gerðist og hvers vegna megum við ekki vita það?

Mannskepnan er í stöðugri þróun og er alltaf að reyna að búa til reglur sem koma í veg fyrir spillingu, reglurnar eru ritaðar í góðri trú og eiga oftast að tryggja sem mest réttlæti. Lýðræðiskerfið sem við búum við í dag byggist á fallegum hugmyndum en svo virðist sem manninum sé enn ókleift að búa til kerfi sem standast mannlega græðgi og valdaspillingu. Því lýðræðið sér til þess að vilji stjórnvöld geta háð stríð til að fæða óseðjandi lyst stórfyrirtækja þurfa stórfyrirtækin, stjórnvöld og fjölmiðlar að takast á eitt við að sannfæra lýðinn um að eitthvað allt annað sé í gangi en raun ber vitni. Útbreiðsla lýðræðis jafnvel? Ja, eða stríðið gegn hryðjuverkum sem virðist geta teygt anga sína hvert sem hentar hverju sinni. Jafnvel í Írak. Hvaðan komu fullyrðingar George W. Bush um að Írak stjórn tengdist árásunum 11.september?

Ég hef persónulega ávallt verið fylgjandi þeirri grundvallarstoð okkar réttarkerfis að fólk sé saklaust uns sekt þess sé sönnuð. Engar sannanir liggja fyrir þeim sögulegu ?staðreyndum? að Al Qaeda og Osama Bin Laden hafi staðið á bak við árásirnar en þó er það þannig í dag að meirihlutinn trúir því. Í lýðræðiskerfi þýðir það víst að það sé sannleikurinn og allt annað samsæriskenningar.

Þegar ég var yngri angraði fátt mig meira en að vita til þess að fólk sæti í fangelsi eftir að hafa verið ranglega ásakað um glæp. Það er þessi sama tilfinning sem hvetur mig áfram til að berjast fyrir því að þetta mál verði rannsakað af fólki sem hefur ekki hagsmuna að gæta og hefur það eitt að markmiði að komast að sannleikanum. Hingað til hefur eina "rannsóknin" verið háð af "The 9/11 Commission" en formaður hennar var repúblikani og framkvæmdastjórinn, repúblikaninn Phillip Zelikow sat í stjórn með Condoleeza Rice, ásamt því að hafa skrifað með henni bók. . FBI, CIA, dómsmálaráðuneytið og Hvíta Húsið voru öll hlífð við rannsóknum og yfirheyrslum.

Það dugar ekki í rannsókn þar sem Bandaríkjastjórn ætti að liggja jafnt til grunsemda og hver annar. Nýlega voru gerð opinber skjöl frá upphafi sjöunda áratugarins þar sem liggja fyrir ýmsar áætlanir um að fremja hryðjuverk á bandarískri grundu og kenna Kúbverjum um það til að fá stuðning við heraðgerðir. Undir þetta skrifuðu "The Joint chief of staff" frá Pentagon en þar sem Robert McNamara, þáverandi varnarmálaráðherra skrifaði ekki undir varð ekkert úr þeim áætlunum.

Núverandi bandaríkjastjórn hefur þegar gerst uppvís að því að ljúga blygðunarlaust í áróðrinum sem þurfti til að fá fólk til samþykkja grimmdarverkin í Írak, við vitum það núna. Við vitum að bandaríkjaher pyntar fanga sína kerfisbundið víðsvegar um heim (Guantanamo Bay og Abu Ghraib eru bara þekktustu dæmin) og við vitum að þeir náðu völdum í Bandaríkjunum með því að svindla á lýðræðinu sem þeir hafa síðan dreift miskunnarlaust um heiminn með byssukúlum og sprengjum.

Ég held að flestir muni hvar þeir voru staddir þegar þeir fréttu að flugvélar hefðu flogið á World Trade Center. Þessir skelfilegu atburðir snertu okkur öll. Byggist vitneskja almennings um þessa atburði á lygi hlýtur það að vera ein allra stærsta lygi sem seld hefur verið heiminum.

Það er það eina sem ég fer fram á, að allir, sama hvar í stiga þjóðfélagsins við sitjum krefjumst þess að þetta mál verði rannsakað. Sama hvað kemur í ljós verður allavega skárra en að láta myrkrið hylja sannleikann.

Jafnvel þið ykkar sem finnast ásakanir um að Bandaríkjastjórn hafi verið í vitorði að þessum árásum fáránlegar ættuð að styðja þann málstað, því þá ættu frekari rannsóknir bara að sanna opinberu kenninguna betur og þagga þar með niður í hvers kyns samsærissjúklingum samstundis... en á meðan ekkert er að gert, fer sjúklingunum fjölgandi.




Þessi helgi var gríðarlega gáfuleg sem og skemmtileg. Þá mættu flestir sigurvegarar í skemmtileikkeppni og góðfólkakeppni Íslands árið 2004 samkvæmt valinkunni dómnefnd í húsafell þar sem Hjörtur hinn háæruverðugi hélt helgarhressleika handa hópnum. Þar var sungið og saumað dögum saman í pottum og pönnum heitum og köldum.

Mikið var gaman.

Og síðan lá leiðin í gær á tónleika Sigur Rós. Mikið voru þeir góðir... awww.... geðveikt, geðveikt geðveikt. Myndefnið sem fylgdi var einkar fallegt og tónlistin óaðfinnanleg og já... ég meina. Ég gæti alveg talað helling, en þeir sem voru þarna skilja alveg.

Mikið var það gaman.

Það er nefnilega mikilvægt að umkringja sig af góðu fólki og það getur skipt sköpum. Ekki það að fólk sé ekki almennt gott, en þá á ég við sem er gott miðað við mín viðmið um hvað er gott.




þriðjudagur, nóvember 22, 2005

Þetta vissi ég þegar ég sá Control Room: http://www.mbl.is/mm/frettir/frett.html?nid=1169871

Annars er sól á himni og vor í lofti og allir í stuttermabolum og mínípilsum í góðu skapi, sem er gott.

Ræðukeppni fór fram um daginn milli FB og Kvennó þar sem rætt var um "lífsgæðakapphlaupið" Kvennó fóru með sigur af hólmi. Ég var ánægður með FB-liðið og fannst þau standa sig með prýði. Ég gat engan vegin ímyndað mér hvernig þessi keppni yrði dæmd en hélt að hún yrði örugglega unnin á litlum mun. Svörin okkar hefðu mátt vera betra en mér fannst það líka eiga við um þeirra svör sem virtust nánast öll fyrirfram skrifuð, oft svör við hlutum sem er vafasamt að halda að við höfum nokkurn tíman sett fram og að sama skapi engin við hlutum á borð við umhverfisvernd eða því að þetta gangi út á að skapa ójöfnuð...

Hvað oddadómararæðu Magnúsar varðar er ég alveg sammála honum að mörgu leyti. Ræðumaður tjáir meiri tilfinningu og hugsun í það sem hann er að segja ef hann les af punktum frekar en af fyrirfram skrifaðri ræðu sem hann hefur lært utan að. Að sama getur það orðið ósannfærandi þegar ræðumaður virðist vera að rifja ræðuna upp frekar en að flytja hana. Mér finnst samt ekki hægt að nota þessi viðmið þegar kemur að því að dæma Morfís keppnir.

Það er rík hefð fyrir því hvernig Morfís vikur fara fram, þar hafa hver skólar mismunandi háttinn á en þarna fara fram pælingar, ræðuskriftir, undirbúningur svara, æfing á flutningi o.s.frv. Það yrði töluvert öðruvísi undirbúningur ef allir væru að passa sig á að skrifa engan texta fyrirfram.

Þetta form af keppni hefur eins og Magnús Davíð benti á þann galla að stundum eru morfís keppnir nær leikriti en ræðukeppni og fer stundum ekki mikil raunveruleg rökræða fram milli liðanna.

Þetta hefur þó þann kost að þarna fer fram blind rökræða þar sem keppst er um að skrifa texta án þess að fá að vita hvernig andstæðingurinn hyggst taka á málinu. Þá er hægt að pæla vel í uppsetningu allra ræðanna, hvenær hvaða rök koma fram og hvenær hvaða rökum andstæðinganna er svarað o.s.frv. Þá er góður tími til að finna þema til að binda ræðuna og útfæra það sem best, semja texta sem flæðir vel og hefur jafnvel ljóðrænu o.s.frv.

Það er svo mismikið eftir ræðumanni hversu vel tilfinningin helst í textanum og það gefur augaleið að það hefur mikið með sannfæringarkraftinn að segja.

Mér finnst Cicero mjög skemmtileg keppni og gaman að sjá ræðukeppni þar sem meiri áhersla er lögð á slíka ræðumennsku. Ég sá Magnús Davíð á úrslitum Cicero í fyrra gera það ótrúlega vel að tala eftir punktum og sannaði að þetta er hægt. Ég efast samt um að allir framhaldsskólanemar kæmust jafn vel frá því.

En ég þakka Kvennskælingum ágæta keppni og vona að þeir nái sem lengst.

Síðan væri gaman að vita hvers vegna konan sem "játaði" að hafa átt þátt í hryðjuverkunum í Jórdaníu var ennþá með bilaða sprengjubeltið vafið utan um sig þegar lögreglan handtók hana fjórum dögum síðar... Jórdanar furða sig amk sjálfir á því og ég yrði að gera það líka.

og Jóhannes, googlaðu aspartam og lestu helstu niðurstöðurnar, þ.e.a.s ekki bara frá opinberu síðunni sem selur þetta. Síðan mæli ég með myndinni Sweet Misery af www.gagnauga.is sem sýnir mjög vel fram á skaðleika efnisins.